राष्ट्रिय विभूति फाल्गुनन्दको १३२औं जन्मजयन्तीको अवसरमा नयाँ शक्तिको शुभकामना

२५ कात्तिक २०७३

विषय : बधाई तथा शुभकामना

किराँत धर्मका महान गुरु, समाज सुधारक र राष्ट्रिय विभूति महागुरु फाल्गुनन्दको १३२औं जन्मजयन्तीको अवसरमा नयाँ शक्ति पार्टी, नेपाल हार्दिक शुभकामना व्यक्त गर्दछ ।

आजभन्दा झण्डै एक शताब्दीअघि पनि उनले तत्कालीन समाजका विकृति र विसंगतिहरुका विरुद्ध सुरु गरेका सामाजिक अभियानहरु अझै पनि उदाहरणीय, मननीय र प्रेरणादायी रहेका छन् । हत्याहिंसा गर्न नहुने, झूठो बोल्न नहुने, सृष्टिकर्ता नारीलाई समाजमा उच्च सम्मान गर्नुपर्ने, मांशाहार तथा मदिरासेवन गर्न नहुनेजस्ता समाज सुधारको अभियान सुरु गरेका उनले त्यतिबेलै लडाईबाट विश्व शान्ति स्थापना हुन नसक्ने निष्कर्ष निकालेका थिए । आफ्नो भाषा, संस्कृतिको संरक्षण र सम्वर्द्धन हुनुपर्छ भन्ने फाल्गुनन्द मौलिक र व्यवहारिक अर्थनीतिका पक्षपाति थिए ।

बहुभाषा, धर्म, संस्कृतिको धनी नेपालमा सबै भाषा, धर्म, क्षेत्र, लिंग, जाति समुदायको अधिकारसहितको एकताबाट मात्र आर्थिक समृद्धि सम्भव छ भन्ने मान्यता नयाँ शक्तिले लिएको छ । १३२औं फाल्गुनन्द जन्मजयन्तीको अवसरमा संविधानमा सबैको स्वामित्व स्थापित गर्दै उन्नत राष्ट्रिय एकतामार्फत समृद्धिमा जान हामी सबैलाई प्रेरणा मिलोस् भन्दै हार्दिक बधाई तथा शुभकामना व्यक्त गर्न चाहन्छौं ।

                                                                     

खिमलाल देवकोटा
प्रवक्ता

डाउनलोड