नयाँ शक्ति पार्टी र संघीय समाजवादी फोरमको संयुक्त प्रेस वक्तव्य

१ साउन २०७४

संयुक्त प्रेस वक्तव्य

 

१. देशमा विद्यमान राजनीतिक समस्याहरुको समाधानको लागि पहिलेदेखि नै अल्झिएर थाँति रहेको संविधान संशोधनको विषयलाई सम्बन्धित पक्षहरुसँग तत्काल वार्ता गरेर टुङ्गो लगाउन पहल गरिनु पर्दछ । सदनमा समेत टेबुल गरिएको संविधान संशोधनको विषयलाई आवश्यक परिमार्जन सहित संशोधन गरी टुङ्ग्याएर मात्रै आगामी निर्वाचनहरुका लागि सहज वातावरण बन्नेछ । अन्यथा यो विषयले गम्भीर राजनीतिक संकट ल्याउन सक्नेछ ।

२. नेपाली जनताले लामो संघर्ष गरेर प्राप्त गरेको संघीयता, गणतन्त्र, धर्मनिरपेक्षता, समावेशिता आदिजस्ता विषयलाई नकारात्मक प्रभाव पार्ने र उल्ट्याउन खोज्ने कुनै पनि गतिविधि हामीलाई स्वीकार्य हुने छैन । हामीले पहिलेदेखि नै तीनवटै निर्वाचन एकै चरणमा हुनुपर्ने विषय उठाउँदै आएको सर्वविदितै छ तर पनि पहिले स्थानीय तहको निर्वाचन गरियो । स्थानीय तहको निर्वाचनपछि स्वत: प्रदेशको चुनाव सम्पन्न गर्नु नै सान्दर्भिक र उपयुक्त हुनेछ । संघीयताको प्रणालीमा राज्य प्रवेश गरिसकेको वर्तमान अवस्थामा फेरी संघीय व्यवस्थापिका संसदको निर्वाचन पुरानै २४० निर्वाचन क्षेत्र अनुरुप गर्ने आशयका वार्ताहरुले संघीय लोकतान्त्रिक गणतन्त्रलाई नै प्रतिकूल प्रभाव पार्नेछ । त्यसैले प्रदेशको चुनाव पहिले गरियोस ।

३. राज्यको पुनर्संरचनामा प्रवेश गरिसकेर स्थानीय तहको निर्वाचन समेत भइसकेको अवस्थामा फेरि उही पुरानै संसदीय निर्वाचन क्षेत्र कायम राख्ने भन्ने विषयप्रति हाम्रो गम्भीर ध्यानाकर्षण भएको छ । कुनै पनि हालतमा पुरानै निर्वाचन क्षेत्र कायम राख्ने कुरा हामीलाई मान्य हुने छैन । यसले संघीयता र समावेशिता सहितको लोकतान्त्रिक गणतन्त्रात्मक प्रणालीलाई प्रतिकूल असर गर्ने भएकाले तत्कालै निर्वाचन क्षेत्र निर्धारण आयोग गठन गरी संसद र प्रादेशिक निर्वाचन क्षेत्र निर्धारण कार्य शुरु गरियोस् । राज्य पुनर्संरचनाको कुनै पनि बहस हुँदा आन्दोलनका उपलब्धीहरुबाट पछि हट्न पाइने छैन र राष्ट्रिय एकतालाई असर पार्ने कुनै पनि कार्य हामीलाई स्विकार्य हुने छैन ।

 

 

––––––––––––––––––––––
(डा. बाबुराम भट्टराई)
संयोजक,
नयाँ शक्ति पार्टी, नेपाल

 

––––––––––––––––––––––
(उपेन्द्र यादव)
अध्यक्ष,
सङ्घीय समाजवादी फोरम, नेपाल

२०७४ साउन १